اسلام آباد: وزیر اعظم پاکستان نے چیئرمین پاکستان علماء کونسل حافظ محمد طاہر محمود اشرفی کو اسلامی و خلیجی ممالک اور بین المذاہب ہم آہنگی کے لیے کوآرڈینیٹر مقرر کر دیا ہے۔
حافظ محمد طاہر محمود اشرفی، جو کہ رابطہ عالم اسلامی کی سپریم کونسل کے رکن اور عالمی سطح پر معروف مذہبی شخصیت ہیں، اس سے قبل بھی وزیراعظم کے نمائندہ خصوصی کے طور پر خدمات انجام دے چکے ہیں۔ عالم اسلام کی موجودہ صورتحال اور خلیجی ممالک کے ساتھ پاکستان کے برادرانہ تعلقات کے تناظر میں ان کی یہ تقرری انتہائی اہمیت کی حامل ہے، جہاں وہ عرب ممالک اور عالمی اسلامی تنظیموں کے ساتھ رابطہ کاری اور تعلقات کی مضبوطی کے لیے اپنا کلیدی کردار ادا کریں گے۔ ان کے اہم عرب شخصیات سے دیرینہ مراسم اور بین المذاہب ہم آہنگی کے لیے ان کی سابقہ خدمات کو مدنظر رکھتے ہوئے انہیں دوبارہ اس اہم ذمہ داری سے نوازا گیا ہے۔
