وزیراعظم پاکستان اور ایرانی صدر کے درمیان ٹیلیفونک رابطہ

اسلام آباد: وزیراعظم پاکستان کو آج دوپہر اسلامی جمہوریہ ایران کے صدر ڈاکٹر مسعود پزشکیان کی جانب سے ایک ٹیلیفون کال موصول ہوئی جو تیس منٹ سے زائد جاری رہی۔
اسلام آباد امن معاہدے پر دستخط کے بعد دونوں رہنماؤں کے درمیان یہ پہلا باضابطہ رابطہ تھا۔
وزیراعظم نے صدر پزشکیان، ایرانی قیادت اور برادر ایرانی عوام کو تاریخی امن معاہدے پر مبارکباد پیش کرتے ہوئے کہا کہ یہ معاہدہ نہ صرف خطے میں امن کے قیام میں مددگار ثابت ہوگا بلکہ ایرانی قوم کی تعمیرِ نو اور پاکستان و ایران کے درمیان مختلف شعبوں میں تعاون کو مزید فروغ دے گا۔
وزیراعظم نے ایران کے سپریم لیڈر آیت اللہ سید مجتبیٰ حسینی خامنہ ای کے لیے بھی نیک تمناؤں اور احترام کا پیغام دیا۔
وزیراعظم نے امن معاہدے پر دستخط کے ایرانی فیصلے کو سراہتے ہوئے مذاکرات کے اگلے مرحلے میں کامیابی کے لیے نیک خواہشات کا اظہار کیا اور یقین دلایا کہ پاکستان ایک برادر اور ہمسایہ ملک کی حیثیت سے ہر شعبے میں ایران کی حمایت جاری رکھے گا۔
صدر پزشکیان نے ایرانی قوم اور اپنی جانب سے وزیراعظم پاکستان اور فیلڈ مارشل سید عاصم منیر کا شکریہ ادا کرتے ہوئے کہا کہ امن معاہدے کی کامیابی میں ثالثی کے عمل کو مہارت اور خلوص کے ساتھ آگے بڑھانے میں ان کا کردار انتہائی اہم رہا۔
ایرانی صدر نے کہا کہ ایران مشکل وقت میں پاکستان کی مثبت، تعمیری کوششوں اور حمایت کو ہمیشہ یاد رکھے گا۔ انہوں نے پاکستانی عوام کے لیے نیک تمناؤں کا اظہار کرتے ہوئے کہا کہ ایران پاکستان کے ساتھ باہمی دلچسپی کے تمام شعبوں میں تعلقات کو مزید مضبوط اور وسیع کرنا چاہتا ہے۔
گفتگو کے دوران دونوں رہنماؤں نے جلد از جلد ایک دوسرے کے دارالحکومتوں کے دوروں پر اتفاق کیا تاکہ دوطرفہ اور علاقائی امور میں موجودہ بہترین تعاون کو مزید آگے بڑھایا جا سکے۔
دونوں رہنماؤں نے آنے والے دنوں میں مسلسل رابطے میں رہنے پر بھی اتفاق کیا۔