ٹرمپ نے ایران پر نئے حملوں کا امکان برقرار رکھا، ایران کا سخت انتباہ

امریکی صدر ڈونالڈ ٹرمپ نے خبردار کیا ہے کہ اگر ایران نے واشنگٹن کے مطالبات تسلیم نہ کیے تو امریکہ بڑے پیمانے پر فوجی کارروائی کے لیے تیار ہے، جبکہ ایران نے بھی سخت ردعمل کی دھمکی دی ہے۔ دونوں ممالک کے تازہ بیانات نے مشرقِ وسطیٰ میں کشیدگی اور ممکنہ جنگ کے خدشات کو ایک بار پھر بڑھا دیا ہے۔
امریکی صدر ڈونالڈ ٹرمپ نے سنیچر کو واضح کیا کہ واشنگٹن اب بھی ایران کے خلاف بڑے پیمانے پر فوجی کارروائی کے لیے تیار ہے، اگر تہران نے امریکہ کے مطالبات پر عمل نہ کیا۔ فرانسیسی ٹی وی چینل ”LCI” کو دیے گئے انٹرویو میں ٹرمپ نے کہا: ”حملوں کا عارضی طور پر رک جانا اس بات کا مطلب نہیں کہ ہم پیچھے ہٹ گئے ہیں۔” انہوں نے مزید کہا: ”اگر ایران نے ہماری شرائط پوری نہ کیں تو ہم اب بھی اس کے خلاف وسیع فوجی حملہ کرنے کے لیے تیار ہیں۔” یہ بیان ایسے وقت میں سامنے آیا جب امریکہ نے سنیچر کی رات گزشتہ دو ہفتوں میں پہلی بار ایران پر فضائی حملے نہیں کیے۔
واشنگٹن کی جانب سے اب تک اس فیصلے کی کوئی وضاحت نہیں کی گئی کہ مسلسل ۱۳ راتوں تک جاری رہنے والے فضائی حملوں کا سلسلہ کیوں روکا گیا، جو عارضی معاہدہ ٹوٹنے کے بعد شروع ہوئے تھے اور آبنائے ہرمز میں جہازوں پر ایران کے حملوں کے جواب میں کیے جا رہے تھے۔ امریکی ویب سائٹ ”ایکسیوس” نے دو نامعلوم باخبر ذرائع کے حوالے سے رپورٹ کیا کہ صدر ٹرمپ نے جمعہ کو امریکی فوج کو ایران پر مزید حملے نہ کرنے کی ہدایت دی۔
گزشتہ چند دنوں میں ٹرمپ نے دھمکی دی تھی کہ وہ حملوں کا دائرہ بڑھا کر ایران کے بجلی گھروں، پلوں اور جزیرہ خارک تک پھیلا سکتے ہیں، جو ایران کی تیل برآمدات کا اہم مرکز ہے۔ انہوں نے یہ بھی عندیہ دیا تھا کہ زیرِ زمین واقع ایک مقام، جسے ”کلہاڑی کا پہاڑ” کہا جاتا ہے اور جس کا تعلق ایران کے جوہری پروگرام سے بتایا جاتا ہے، بھی نشانہ بنایا جا سکتا ہے۔ تاہم ٹرمپ نے جمعہ کو کہا کہ انہوں نے اب تک کوئی حتمی فیصلہ نہیں کیا۔
دوسری جانب ایران کی فوج نے امریکہ کو خبردار کیا ہے کہ اگر اس نے دوبارہ فوجی حملے شروع کیے تو مشرقِ وسطیٰ میں جاری جنگ کا دائرہ مزید وسیع ہو سکتا ہے۔ ایرانی فوج کے ترجمان محمد اکرمینیا نے سرکاری ٹیلی وژن سے گفتگو میں کہا کہ اگر امریکہ اسرائیل کے مؤقف کے تحت دوبارہ حملے کرتا ہے یا جنگ جاری رکھنے پر اصرار کرتا ہے تو اس کے نتائج پورے خطے پر مرتب ہوں گے۔
ایرانی فوج کا یہ بیان ایسے وقت سامنے آیا جب اسرائیلی وزیراعظم بنیامین نیتن یاہو کے دورۂ واشنگٹن کی تیاریاں جاری ہیں، جس دوران توقع ہے کہ امریکہ اور اسرائیل کی قیادت خطے کی سکیورٹی صورتحال اور ایران سے متعلق پالیسی پر تبادلہ خیال کرے گی۔