(24نیوز)بھارتی شہر کولکتہ میں ہوٹل میں آگ لگنے کے و اقعے میں بچے سمیت 9 افراد ہلاک ہوگئے۔
بھارتی ریاست بنگال کے دارالحکومت کولکتہ کے ایک ہوٹل میں لگنے والی خوفناک آگ کے نتیجے میں ایک بچے سمیت 9 افراد ہلاک اور کم از کم 6 افراد زخمی ہوگئے،بھارتی حکام کے مطابق ہلاک ہونے والوں میں بنگلا دیشی شہری بھی شامل تھے جو علاج کے لیے کولکتہ آئے ہوئے تھے۔
مقامی پولیس کا کہنا ہےکہ آگ مقامی وقت کے مطابق تقریباً رات 2 بج کر 50 منٹ پر ہوٹل کی عمارت کی دوسری منزل پر لگی جس پر ایک گھنٹے کے اندر قابو پا لیا گیا جبکہ واقعے کے دوران تقریباً 30 افراد کو ریسکیو کیا گیا۔
حکام کے مطابق ابتدائی طور پر خدشہ ہے کہ آگ بجلی کے شارٹ سرکٹ کے باعث لگی۔
