(ویب ڈیسک)بیلجیئم میں آلودہ انڈوں کے باعث سالمونیلا کے کیسز میں غیر معمولی اضافہ ہوا ہے، جس کے نتیجے میں اب تک کم از کم 306 افراد متاثر ہو چکے ہیں، جبکہ متعدد مریضوں کو طبی امداد کے لیے اسپتال منتقل کیا گیا ہے، حکام کے مطابق اس وبا کو ملک میں سالمونیلا کا غیر معمولی اور ریکارڈ پھیلاؤ قرار دیا جا رہا ہے۔
رپورٹ کے مطابق متاثرہ افراد نے ایک پولٹری فارم سے حاصل کیے گئے ایسے انڈے استعمال کیے تھے جن میں سالمونیلا بیکٹیریا کی موجودگی کا شبہ ہے، حکام کا کہنا ہے کہ بیلجیئم میں سالمونیلا کے کیسز سامنے آنا غیر معمولی نہیں، تاہم ایک ہی ذریعے سے اتنی بڑی تعداد میں افراد کا متاثر ہونا پہلے نہیں دیکھا گیا۔ خوش قسمتی سے اب تک کسی ہلاکت کی اطلاع نہیں ملی۔
20 لاکھ مشتبہ انڈے مارکیٹ میں پہنچ گئے
بیلجیئم کی فوڈ سیفٹی ایجنسی کے مطابق آلودگی کا پہلی بار مئی میں پتا چلا، جس کے بعد متاثرہ انڈوں کی واپسی کا حکم دیا گیا اور فلینڈرز میں واقع فارم کے ایک پولٹری ہاؤس کو بند کر دیا گیا۔
تاہم مزید افراد میں سالمونیلا کی تشخیص کے بعد حکام نے پورے فارم کو بند کر دیا، 10 اگست کو انڈوں کی دوسری مرتبہ واپسی کا حکم جاری کیا گیا، جس کے بعد فارم میں موجود تمام مرغیوں کو تلف کر دیا گیا۔
یہ بھی پڑھیں:ملک کے بیشتر علاقوں میں موسم گرم و مرطوب، کل سے بارشوں کا امکان
حکام کے مطابق تقریباً 20 لاکھ مشتبہ انڈے بیلجیئم اور پڑوسی ملک لکسمبرگ میں فروخت کیے گئے تھے، ان انڈوں میں سالمونیلا کی آلودگی کا خدشہ ظاہر کیا گیا ہے، لکسمبرگ کے حکام نے بھی صارفین کو انڈوں کے استعمال سے گریز کرنے اور انہیں واپس کرنے کی ہدایت کی ہے۔
سالمونیلا کیا ہے؟
سالمونیلا وائرس نہیں بلکہ بیکٹیریا کی ایک قسم ہے جو انسانوں میں خوراک کے ذریعے ہونے والی بیماری، جسے سالمونیلوسس کہا جاتا ہے، کا سبب بن سکتی ہے۔
اس انفیکشن کی عام علامات میں:
اسہال
بخار
پیٹ میں مروڑ یا درد
متلی اور قے
شامل ہیں۔ علامات عموماً آلودہ خوراک استعمال کرنے کے 12 سے 72 گھنٹے کے اندر ظاہر ہو سکتی ہیں، اگرچہ بعض افراد میں بیماری کی شدت مختلف ہو سکتی ہے۔
انڈوں کے استعمال میں احتیاط ضروری
ماہرین صحت کے مطابق انڈوں کو اچھی طرح پکانے سے سالمونیلا انفیکشن کا خطرہ کم کیا جا سکتا ہے، صارفین کو خاص طور پر واپس منگوائے گئے یا مشتبہ انڈوں کے استعمال سے گریز کرنا چاہیے۔
مزید پڑھیں:حضرت محمد ﷺ یتیموں کا سہارا اور دونوں جہانوں کے لیے رحمت بن کر تشریف لائے:مریم نواز
حکام نے شہریوں پر زور دیا ہے کہ اگر ان میں سالمونیلا سے ملتی جلتی علامات ظاہر ہوں، خصوصاً شدید یا مسلسل اسہال، تیز بخار، بار بار قے یا پانی کی شدید کمی کی علامات، تو بروقت طبی مشورہ حاصل کریں۔
ماہرین کے مطابق سالمونیلا انفیکشن اکثر قابلِ علاج ہوتا ہے، تاہم کم عمر بچوں، بزرگوں اور کمزور مدافعتی نظام رکھنے والے افراد میں یہ زیادہ سنگین شکل اختیار کر سکتا ہے۔
