ایس سی او اجلاس: پاکستان، انڈیا سمیت رکن ممالک کے سربراہان کرغزستان پہنچنا شروع

شنگھائی تعاون تنظیم (ایس سی او) کا سربراہ اجلاس 31 اگست سے یکم ستمبر تک کرغزستان کے دارالحکومت بشکیک میں ہو رہا ہے جس میں وزیر اعظم شہباز شریف پاکستان کی نمائندگی کریں گے۔

پیر کو وزیراعظم کے دفتر سے جاری بیان کے مطابق وزیراعظم شہباز شریف تین روزہ دورے پر کرغستان کے دارالحکومت بشکیک روانہ ہو گئے ہیں جہاں وہ  ایس سی او سربراہ  اجلاس سے خطاب کریں گے اور مختلف  علاقائی و عالمی امور  پر پاکستان کا مؤقف پیش کریں گے۔

شہباز شریف ایس سی او پلس سربراہی اجلاس میں بھی شرکت کریں گے۔ بیان میں مزید بتایا گیا ہے کہ وزیراعظم، ورلڈ نومیڈ گیمز کی افتتاحی تقریب میں بطور مہمان خصوصی بھی شریک ہوں گے۔

بیان کے مطابق: ’دورے کے دوران وزیراعظم شہباز شریف شنگھائی تعاون تنظیم کے اجلاس میں شرکت کرنے والے مختلف ممالک کے رہنماؤں سے دوطرفہ ملاقاتیں بھی کریں گے۔ ملاقاتوں میں باہمی تعلقات، تجارت و سرمایہ کاری، علاقائی تعاون اور باہمی دلچسپی کے دیگر امور پر تبادلہ خیال کیا جائے گا۔‘

خبر رساں ادارے ایسوسی ایٹڈ پریس (اے پی) کے مطابق  چین، روس اور انڈیا کے رہنما ان سربراہان مملکت میں شامل ہیں جو ایس سی او کے سربراہی اجلاس کے لیے جمع ہو رہے ہیں۔

ایس سی او کو امریکی عالمی اثر و رسوخ کے توڑ کے طور پر پیش کیا جاتا ہے۔

بشکیک میں شنگھائی تعاون تنظیم (ایس سی او) کے سربراہ اجلاس کے لیے چین کے صدر شی جن پنگ اور ایران کے صدر مسعود پزشکیان موجود ہیں، جبکہ روس کے صدر ولادیمیر پوتن بھی دو روزہ اجلاس میں شرکت کے لیے پیر کو پہنچنے والے ہیں۔ اجلاس میں ایک درجن سے زائد دیگر ممالک کے رہنما بھی شریک ہوں گے۔

شنگھائی تعاون تنظیم اپنے قیام کے 25 سال مکمل ہونے کا جشن منا رہی ہے۔ تنظیم میں چین، روس، بھارت، پاکستان، ایران، وسطی ایشیا کے چار ممالک اور روس کا اتحادی بیلاروس شامل ہیں۔

شی جن پنگ نے بشکیک پہنچنے کے بعد وسطی ایشیائی ملک کرغزستان کے ساتھ تعلقات کو ’سنہری دور‘ قرار دیا۔ چین ایسے خطے میں اپنا اثر و رسوخ بڑھا رہا ہے جہاں تاریخی طور پر روس کا غلبہ رہا ہے۔

روس اور چین ماضی میں ایس سی او اجلاسوں کو کثیر قطبی عالمی نظام کے اپنے تصور کو فروغ دینے اور مغرب کے خلاف مشترکہ مؤقف پیش کرنے کے لیے استعمال کرتے رہے ہیں۔

یہ اجلاس یوکرین پر روسی حملے کے ساڑھے چار سال اور امریکہ اور ایران کے درمیان جنگ کے چھ ماہ بعد ہو رہا ہے۔

ایرانی صدر مسعود پزشکیان بھی بشکیک پہنچ گئے ہیں۔ روس، چین اور ایران کے صدور کے علاوہ بھارتی وزیر اعظم نریندر مودی اور پاکستانی وزیر اعظم شہباز شریف بھی کرغزستان کے صدر صدر صَدر جاپاروف کی زیر صدارت اجلاس کے مکمل اجلاس میں شرکت کریں گے۔

ترک صدر رجب طیب اردوغان کی بھی شرکت متوقع ہے، تاہم ترکیہ تنظیم کا باضابطہ رکن نہیں۔

سفارتی سرگرمیاں

کریملن کے ترجمان یوری اوشاکوف کے مطابق ولادیمیر پوتن کی دیگر رہنماؤں کے علاوہ ایرانی صدر مسعود پزشکیان اور شی جن پنگ سے الگ الگ دوطرفہ ملاقاتیں بھی متوقع ہیں۔

روس اور ایران، جو دنیا کے سب سے زیادہ پابندیوں کا سامنا کرنے والے ممالک میں شامل ہیں، نے یوکرین پر روسی حملے کے بعد فوجی اور اقتصادی تعلقات میں نمایاں اضافہ کیا ہے۔

امریکی صدر ڈونلڈ ٹرمپ روس اور چین کو ایران کو اسلحہ فراہم کرنے سے خبردار کر چکے ہیں۔

پوتن اور پزشکیان کی ملاقات ایسے وقت میں ہو رہی ہے جب امریکی میڈیا میں قیاس آرائیاں جاری ہیں کہ امریکی خفیہ ادارے سی آئی اے کے ڈائریکٹر جان ریٹکلف کے حالیہ ماسکو دورے میں یوکرین اور ایران کے معاملات پر روسی حکام سے بات چیت ہوئی ہو سکتی ہے۔

ایس سی او نے تاریخی طور پر اقتصادی معاملات پر توجہ مرکوز رکھی ہے، تاہم حالیہ برسوں میں روس اور چین کی قیادت میں اس تنظیم کی اہمیت میں اضافہ ہوا ہے۔

تنظیم کے 10 ارکان کے علاوہ اب اس کے 15 ’مکالماتی شراکت دار‘ ہیں، جن میں ترکیہ، سعودی عرب اور قطر شامل ہیں۔ افغانستان اور منگولیا کو مبصر ممالک کا درجہ حاصل ہے۔

تنظیم کے بانی اعلامیے کے مطابق ایس سی او ’دوسری ریاستوں کے خلاف بننے والا اتحاد نہیں‘ ہے، تاہم پوتن اور شی جن پنگ اس کے اجلاسوں میں متعدد بار مغرب پر تنقید کر چکے ہیں۔

جنگیں اور تجارتی کشیدگی

بشکیک اجلاس ایسے وقت میں ہو رہا ہے جب ایس سی او کے بعض رکن ممالک حقیقی جنگوں، بالخصوص یوکرین اور ایران کے تنازعات، جبکہ بعض امریکہ کی جانب سے چینی اور بھارتی مصنوعات پر عائد محصولات کے باعث تجارتی جنگوں کا سامنا کر رہے ہیں۔

اس ماہ امریکہ نے ایران کے تجارتی شراکت داروں پر سونے، ٹیکنالوجی، ڈیجیٹل اثاثوں، ہوابازی اور بحری نقل و حمل کے شعبوں میں ثانوی پابندیاں عائد کیں، جن کا مقصد تہران کی معیشت کو شدید نقصان پہنچانا ہے۔

واشنگٹن ایران کے اتحادیوں کو بھی پابندیوں کی دھمکیاں دے چکا ہے۔

ایران سے بڑی مقدار میں تیل درآمد کرنے والے چین نے جواباً کہا ہے کہ وہ اپنے مفادات کا ’مضبوطی سے دفاع‘ کرے گا۔

1979 کے انقلاب کے بعد سے پابندیوں کا سامنا کرنے والا ایران مسلسل کہتا رہا ہے کہ وہ معاشی دباؤ کے سامنے نہیں جھکے گا، تاہم صدر پزشکیان نے تسلیم کیا ہے کہ ملک کو ’معاشی مشکلات‘ کا سامنا ہے۔

ایران 2023 میں شنگھائی تعاون تنظیم کا رکن بنا تھا۔

بین الاقوامی تعلقات کے ماہر محمد حسن نجمی نے اے ایف پی کو بتایا کہ تہران سمجھتا ہے کہ ان اتحادوں میں رکنیت اور فعال شرکت اسے امریکی اور یورپی پابندیوں سے بچنے میں مدد دے سکتی ہے۔

تاہم ان کے مطابق تنظیم کے عملی فوائد ابھی غیر یقینی ہیں، کیونکہ ’بحران کے وقت ان اتحادوں نے شاذ و نادر ہی ایران کو اپنی مشکلات حل کرنے میں مدد دی ہے۔‘

شنگھائی تعاون تنظیم دنیا کی تقریباً 40 فیصد آبادی اور عالمی مجموعی پیداوار کے 25 فیصد کی نمائندگی کا دعویٰ کرتی ہے، تاہم اس کے ارکان کے درمیان اختلافات بھی موجود ہیں۔

روس اور چین وسطی ایشیا میں اثر و رسوخ کے لیے ایک دوسرے سے مسابقت کرتے ہیں، جبکہ چین کے بھارت اور پاکستان کے ساتھ تعلقات بھی بعض اوقات کشیدہ رہے ہیں۔

ایس سی او کو 2001 میں چین، روس اور چار وسطی ایشیائی ریاستوں نے ایک سکیورٹی فورم کے طور پر قائم کیا تھا۔ گذشتہ چوتھائی صدی کے دوران، اس کے حجم اور اثر و رسوخ میں اضافہ ہوا ہے، اگرچہ اس کے اہداف اور پروگرام غیر واضح ہیں اور اس کی پہچان کم ہے۔

اب اس میں 10 ممالک شامل ہیں۔ روس، چین، انڈیا، ایران، پاکستان، بیلاروس، قازقستان، کرغزستان، تاجکستان اور ازبکستان۔ کئی دیگر ممالک کو ’ڈائیلاگ پارٹنرز‘ کا درجہ حاصل ہے۔