مدینہ ریجن کی جانب داغا گیا حوثیوں کا بیلسٹک میزائل تباہ کر دیا: سعودی اتحاد

یمن میں حوثی تحریک کے خلاف لڑنے والے سعودی قیادت میں قائم اتحاد نے جمعرات کو کہا ہے کہ اس کے فضائی دفاعی نظام نے مدینہ ریجن کی جانب داغے گئے ایک بیلسٹک میزائل کو فضا میں ہی روک کر تباہ کر دیا ہے۔

اتحاد کے ترجمان میجر جنرل ترکی المالکی نے سوشل میڈیا پلیٹ فارم ایکس پر ایک پوسٹ میں میزائل کو روکنے کی تصدیق کرتے ہوئے کہا کہ اسے ان کے بقول ’دہشت گرد حوثی ملیشیا‘ نے داغا تھا۔

اتحاد نے میزائل داغے جانے کے مقام، اسے روکنے کے حالات یا اس واقعے کے نتیجے میں کسی نقصان یا جانی نقصان کے بارے میں مزید تفصیلات فراہم نہیں کیں۔

یہ اعلان ایسے وقت میں سامنے آیا ہے جب خطے میں کشیدگی بڑھ رہی ہے اور جزیرہ نمائے عرب میں سکیورٹی سے متعلق خدشات برقرار ہیں۔

یہ تنازع امریکہ اور اسرائیل کی ایران کے خلاف کارروائیوں کے دوران ایک ایسے محاذ کی صورت اختیار کر گیا ہے جو خطے میں عدم استحکام میں مزید اضافہ کر رہا ہے جبکہ اس وسیع تر جنگ میں امریکہ کا اتحادی سعودی عرب بھی دباؤ کی زد میں آ گیا ہے۔

دوسری جانب سعودی عرب کے محکمہ شہری دفاع نے جمعرات کو ینبع گورنریٹ میں ممکنہ خطرے سے متعلق انتباہ جاری کیا ہے۔

ینبع مملکت کی اہم ترین بندرگاہوں اور توانائی کی تنصیبات میں سے ایک کا مرکز ہے۔

محکمہ شہری دفاع کی جانب سے آن لائن جاری کیے گئے بیان میں کہا گیا کہ ’ینبع گورنریٹ میں ممکنہ خطرے سے خبردار کرنے کے لیے قومی ابتدائی انتباہی پلیٹ فارم کے ذریعے ایک وارننگ جاری کی گئی ہے۔‘

بحیرہ احمر کے ساحل پر واقع ینبع ایسٹ ویسٹ پائپ لائن کا آخری مقام ہے۔ اس پائپ لائن کے ذریعے سعودی عرب اپنا تیل آبنائے ہرمز کی ناکہ بندی سے بچاتے ہوئے برآمد کر سکتا ہے۔