کینسر سے لڑنے والی امریکی خاتون کے حجاب کے سوال پر مسلم خواتین کی بے مثال حمایت

cancer 171126 d


واشنگٹن: امریکی ریاست الاباما کی 42 سالہ جےسی ایبٹ، جو مرحلہ چار کے میٹاسٹیٹک بریسٹ کینسر سے متاثر ہیں، نے سوشل میڈیا پلیٹ فارم ’تھریڈز‘ پر مسلمانوں سے پوچھا کہ کیا وہ مسلمان نہ ہونے کے باوجود حجاب پہن سکتی ہیں۔ ان کے سوال پر دنیا بھر سے مسلم خواتین نے محبت، مشورے، مفت اسکارف اور دعاؤں کی پیشکش کے ساتھ جواب دیا۔
جےسی ایبٹ کو 2019ء میں چھاتی کا سرطان تشخیص ہوا تھا۔ علاج کے دوران بال جھڑنے کے بعد وہ وِگ استعمال کرتی تھیں، لیکن وِگ کی گرمی، پسینہ اور خارش ان کے لیے مشکل بنا دیتی تھی۔ انہوں نے حجاب خریدا، جو انہیں نرم اور آرام دہ لگا، مگر اس بات کا خدشہ تھا کہ غیر مسلم ہونے کے ناطے حجاب پہننا مسلم خواتین کے مذہبی جذبات کے خلاف نہ ہو۔
انہوں نے لکھا: ”کیا میں حجاب پہن سکتی ہوں یا یہ بے ادبی ہوگی؟ مجھے آخری درجے کا کینسر ہے اور وِگ بہت گرم اور خارش پیدا کرنے والی ہوتی ہیں۔“ پوسٹ تیزی سے وائرل ہوئی اور تقریباً 100 ہزار لائکس کے ساتھ ہزاروں جوابات موصول ہوئے۔
مسلم خواتین نے انہیں واضح طور پر بتایا کہ حجاب پہننے میں کوئی بے ادبی نہیں۔ کینیڈا کی مصنفہ سوزین عبدالحق نے نرم جرسی کپڑے کا اسکارف تجویز کیا، جبکہ دیگر خواتین نے ریشمی یا ساٹن کی انر کیپ، پن کا استعمال اور حجاب باندھنے کے طریقے سکھانے کی پیشکش کی۔
جرمنی کے شہر ایسن میں حجاب کے چھوٹے کاروبار سے وابستہ سامیہ انتان خورونیسہ زائلی نے ایبٹ کو مفت اسکارف بھیجنے کی پیشکش کی۔ کئی صارفین نے ترسیل کے اخراجات میں حصہ لینے کی خواہش ظاہر کی، جبکہ کچھ خواتین نے ویڈیو کال کے ذریعے حجاب باندھنا سکھانے کی پیشکش بھی کی۔
اس کہانی نے صرف حجاب تک محدود نہیں رہا؛ سوشل میڈیا پر ہونے والی توجہ کے بعد ایبٹ کے لیے فنڈ ریزنگ میں بھی اضافہ ہوا، جس سے ان کی گاڑی کی مرمت اور تین بچوں کی دیکھ بھال سے متعلق مالی دباؤ کم ہوا۔ ایبٹ نے کہا کہ اس تجربے نے ان کی زندگی مکمل طور پر بدل دی۔
ماہرین کے مطابق حجاب کا مذہبی اور علامتی دونوں پہلو ہے، تاہم سر ڈھانپنے والا اسکارف ہر صورت مذہبی شناخت کا اظہار نہیں ہوتا۔ ایبٹ کے احترام بھرے سوال اور مسلم خواتین کے خیرمقدم کو سوشل میڈیا پر مذہبی احترام، باہمی اعتماد اور انسانی ہمدردی کی مثال قرار دیا جا رہا ہے۔

متعلقہ پوسٹ