سعودی عرب نے ہمیشہ جنگ و امن میں پاکستان کا ساتھ دیا، وفاقی وزیر داخلہ محسن نقوی

اسلام آباد: وفاقی وزیر داخلہ محسن نقوی نے سعودی عرب کے سفارتخانے کا دورہ کیا جہاں سعودی عرب کے سفیر نواف بن سعید احمد المالکی نے ان کا پرجوش استقبال کیا۔ اس موقع پر وزیر داخلہ اور سعودی سفیر کے درمیان تفصیلی ملاقات ہوئی۔
محسن نقوی نے حکومتِ سعودی عرب اور سفیر کا پاکستان-بھارت کشیدگی کے دوران مخلصانہ، برادرانہ اور مؤثر کردار پر شکریہ ادا کیا۔ انہوں نے کہا کہ سعودی عرب نے ہمیشہ جنگ ہو یا امن، ہر دور میں پاکستان کا ساتھ دیا ہے اور دونوں ممالک کے تعلقات ہر آزمائش میں پورے اترے ہیں۔
وزیر داخلہ نے بتایا کہ سعودی عرب میں بھیک مانگنے کے دھندے میں ملوث مافیا کے خلاف جامع کریک ڈاؤن جاری ہے۔ اس سلسلے میں زیرو ٹالرنس پالیسی اختیار کی گئی ہے تاکہ ایسے عناصر کا خاتمہ کیا جا سکے۔
سعودی سفیر نواف بن سعید احمد المالکی نے اس موقع پر کہا کہ پاکستان ہمارا برادرانہ اور دوست ملک ہے، اور سعودی عرب پاکستان کے ساتھ اپنے تعلقات کو انتہائی اہمیت دیتا ہے۔