غزہ نسل کشی کے ۳ سال: ۲۰ ہزار سے زائد طلبہ، ۲۶۳ صحافی شہید: فلسطینی حکام

غزہ،
فلسطینی وزارتِ تعلیم کے مطابق غزہ کی پٹی اور مقبوضہ مغربی کنارے میں اسرائیلی نسل کشی کے تین سال کے دوران ۲۰۷۴۸ طلبہ اور ۱۰۵۸ تعلیمی و انتظامی عملہ شہید ہو چکا ہے۔ تعلیمی شعبے کے خلاف اسرائیلی خلاف ورزیوں پر ایک شماریاتی رپورٹ میں وزارت نے کہا کہ اعداد و شمار میں اسکولوں اور یونیورسٹیوں کے طلبہ اور عملے کے ہزاروں زخمی اور گرفتار افراد، نیز درجنوں تعلیمی اداروں کی تباہی یا انہیں نشانہ بنایا جانا بھی شامل ہے۔
غزہ کی پٹی میں ۱۹۱۸۹ اسکول طلبہ اور ۱۳۸۶ یونیورسٹی طلبہ شہید ہوئے، جبکہ ۲۸۵۸۶ اسکول طلبہ اور ۳۰۸۲ یونیورسٹی طلبہ زخمی ہوئے۔ وزارت کے مطابق اسکولوں کے ۸۰۵ تعلیمی و انتظامی عملے اور ۲۴۶ یونیورسٹی اہلکار شہید ہوئے، جبکہ ۳۲۹۸ اسکول عملہ اور ۱۴۹۳ یونیورسٹی عملہ زخمی ہوا۔
مغربی کنارہ
رپورٹ کے مطابق مقبوضہ مغربی کنارے میں ۱۳۴ اسکول طلبہ اور ۳۹ یونیورسٹی طلبہ شہید ہوئے، جبکہ ۸۷۱ اسکول طلبہ اور ۲۸۳ یونیورسٹی طلبہ زخمی ہوئے۔ اسرائیلی افواج نے ۴۱۶ اسکول طلبہ اور ۴۸۱ یونیورسٹی طلبہ کو حراست میں بھی لیا۔ اسکولوں کے سات تعلیمی و انتظامی اہلکار شہید اور ۲۶ زخمی ہوئے، جبکہ ۱۷۶ سے زائد اساتذہ اور اسکول ملازمین اور ۲۱ یونیورسٹی اہلکار حراست میں لیے گئے۔
۲۶۳ میڈیا کارکن شہید
غزہ گورنمنٹ میڈیا آفس کے ڈائریکٹر اسماعیل الثوابتہ نے انادولو کو بتایا کہ اسرائیل کی تین سالہ جنگ کی غزہ کے صحافی بھاری قیمت ادا کر رہے ہیں اور اب تک اسرائیلی حملوں میں ۲۶۳ صحافی شہید ہو چکے ہیں۔ اکتوبر ۲۰۲۳ء سے ۵۰ صحافیوں کو اسرائیلی جیلوں میں حراست میں لیا گیا، جن میں سے ۲۳ اب بھی قید ہیں۔ تین صحافی اب بھی لاپتہ ہیں: نضال سہیل الوحیدی، ہیثم جمال عبد الواحد اور احمد عصام الاغا۔
فلسطینی حکام اور صحافتی تنظیموں کے مطابق نسل کشی کی جنگ کے تین سالوں نے فلسطینی صحافیوں پر تباہ کن اثرات مرتب کیے ہیں، سینکڑوں مزید زخمی، گرفتار یا بے گھر ہوئے۔ صحافیوں نے اپنے گھر، کام کی جگہیں اور خاندان کے افراد کھوئے ہیں، اور بہت سے رپورٹنگ جاری رکھنے کے لیے بمباری کے مقامات، بے گھر کیمپوں اور اسپتالوں کے درمیان منتقل ہو رہے ہیں۔ چونکہ اسرائیل غیر ملکی صحافیوں کو علاقے میں داخل ہونے سے روک رہا ہے، اس لیے یہی صحافی زمینی کوریج کا بنیادی ذریعہ ہیں۔
الثوابتہ نے بتایا کہ اسرائیلی حملوں نے ۱۶ سیٹلائٹ ٹیلی ویژن دفاتر، ۱۱ ریڈیو اداروں، ۱۲ اخبارات و رسائل کے دفاتر، ۲۳ ڈیجیٹل میڈیا تنظیموں، ۲۷ پرنٹنگ ہاؤسز اور میڈیا کے کام سے وابستہ پانچ یونینوں اور حقوق کی تنظیموں کو نقصان پہنچایا یا تباہ کر دیا۔ انہوں نے میڈیا سیکٹر کے نقصانات کا تخمینہ تقریباً ایک ارب ڈالر لگایا، جس میں احاطے، سامان، نشریاتی گاڑیاں اور تکنیکی آلات شامل ہیں۔
۷ ستمبر کو انٹرنیشنل فیڈریشن آف جرنلسٹس نے کہا کہ غزہ میں صحافیوں کی ہلاکتوں کی تعداد جدید صحافتی تاریخ میں سب سے زیادہ ہے۔ فلسطینی جرنلسٹس سنڈیکیٹ نے پہلے بتایا تھا کہ شہید ہونے والوں میں ۲۷ خواتین صحافی شامل ہیں جبکہ تقریباً ۵۰۰ صحافی زخمی ہوئے۔ سنڈیکیٹ کے اندازے کے مطابق غزہ میں تقریباً ۱۲۰۰ صحافی تھے، یعنی نسل کشی کے دوران پانچویں حصے سے زیادہ شہید ہو چکے ہیں۔
سنڈیکیٹ کے مطابق زندہ بچ جانے والے ۶۰ سے ۷۵ فیصد صحافی، یعنی ۷۰۰ سے ۹۰۰ کے درمیان، اپنے گھر کھو چکے ہیں یا زبردستی بے گھر کر دیے گئے ہیں، جبکہ ۸۰ فیصد سے زائد میڈیا دفاتر اور ادارے مکمل یا جزوی طور پر تباہ ہو چکے ہیں۔ بجلی، انٹرنیٹ، حفاظتی سامان اور کیمروں کی کمی کے باعث صحافی خیموں، بے گھر افراد کے مقامات اور اسپتالوں کے آس پاس سے رپورٹنگ پر مجبور ہیں۔ رپورٹ میں شہید صحافیوں کی طویل فہرست بھی دی گئی ہے، جن میں بلال جاد اللہ، منتصر السواف، سامر ابو دقہ، حمزہ الدحدوح اور ۲۰۲۵ء میں خیموں اور اسپتالوں میں شہید ہونے والے انس الشریف شامل ہیں۔
اکتوبر ۲۰۲۳ء سے غزہ میں اسرائیل کی نسل کشی کے نتیجے میں ۷۴ ہزار سے زائد فلسطینی شہید اور ۱۷۵ ہزار سے زائد زخمی ہو چکے ہیں، جبکہ علاقے کے تقریباً ۹۰ فیصد انفراسٹرکچر کو نقصان پہنچا یا تباہ کر دیا گیا ہے۔ اسی عرصے میں اسرائیلی افواج اور آبادکاروں نے مقبوضہ مغربی کنارے میں حملے تیز کیے ہیں، جن میں ۱۲۱۰ فلسطینی شہید، تقریباً ۱۳۳۵۰ زخمی اور ۲۴۶۰۰ سے زائد حراست میں لیے گئے ہیں۔