اسلام آباد — محمد سلیم سے
پولیس لائنز ہیڈکوارٹرز میں نئے ترقی یاب 12 پولیس افسران کو رینک لگانے کی پروقار تقریب کا انعقاد کیا گیا۔ تقریب میں ڈی آئی جی ہیڈکوارٹرز ملک جمیل ظفر نے بطور مہمانِ خصوصی شرکت کی اور ترقی پانے والے افسران کو اپنے ہاتھوں سے رینک لگائے۔
انسپکٹر جنرل آف پولیس اسلام آباد سید علی ناصر رضوی کے خصوصی احکامات پر اسلام آباد پولیس میں محکمانہ ترقیوں کا سلسلہ جاری ہے، جس کے تحت یہ تقریب منعقد کی گئی۔ تقریب میں اے آئی جی لاجسٹکس عبدالحق عمرانی، ایس پی ہیڈکوارٹرز پری گل ترین، ڈی ایس پی ہیڈکوارٹرز اور دیگر سینئر پولیس افسران نے بھی شرکت کی۔ ترقی یاب افسران کے اہلِ خانہ کو خصوصی طور پر مدعو کیا گیا تھا، جن کا ڈی آئی جی ہیڈکوارٹرز نے پرتپاک خیرمقدم کیا۔
تقریب سے خطاب کرتے ہوئے ڈی آئی جی ہیڈکوارٹرز ملک جمیل ظفر نے کہا کہ ترقی یاب افسران کی محنت، لگن، بہادری اور حوصلے کو سلام پیش کرتا ہوں۔ یہ اللہ تعالیٰ کا انعام اور ان کی کاوشوں کا ثمر ہے کہ وہ آج اس مقام پر پہنچے ہیں۔
انہوں نے کہا کہ پولیس ایک مقدس محکمہ ہے اور اب ترقی یاب افسران کے کاندھوں پر ذمہ داریاں مزید بڑھ گئی ہیں۔ انہوں نے افسران کو ہدایت کی کہ وہ اپنے فرائضِ منصبی احسن طریقے سے ادا کریں، محکمے کی نیک نامی کا باعث بنیں اور شہریوں کو انصاف کی فراہمی کو اپنا اولین شعار بنائیں۔
ملک جمیل ظفر نے امید ظاہر کی کہ افسران ہمیشہ کی طرح خوش اخلاقی، دل جمعی اور نیک نیتی کے ساتھ عوام کی خدمت کرتے رہیں گے۔
