اسلام آباد: وفاقی وزیر داخلہ محسن نقوی سے برطانوی ہائی کمشنر جین میریٹ کی ملاقات

اسلام آباد: وفاقی وزیر داخلہ محسن نقوی سے برطانوی ہائی کمشنر جین میریٹ نے ملاقات کی، جس میں پاک۔برطانیہ تعلقات اور مختلف شعبوں میں دوطرفہ تعاون کے فروغ پر تبادلہ خیال کیا گیا۔
ملاقات میں انسداد دہشت گردی، انسداد منشیات، بارڈر سیکیورٹی اور انسانی سمگلنگ جیسے شعبوں میں اشتراکِ کار بڑھانے پر بھی بات چیت ہوئی۔
برطانوی ہائی کمشنر نے وزیر داخلہ کو نشانِ امتیاز ملنے پر مبارکباد دی اور نیک تمناؤں کا اظہار کیا۔ انہوں نے پاکستان میں حالیہ بارشوں اور سیلاب کے باعث انسانی جانوں کے ضیاع پر افسوس کا اظہار کرتے ہوئے جاں بحق افراد کے لواحقین سے ہمدردی اور تعزیت بھی کی۔
اس موقع پر وفاقی وزیر داخلہ محسن نقوی نے کہا کہ پاکستان ہمیشہ امن کا داعی رہا ہے اور دہشت گردی کی ہر شکل کی پرزور مذمت کرتا ہے۔ انہوں نے کہا کہ برطانیہ پاکستان کے ترقیاتی سفر کا ایک اہم شراکت دار ہے اور ہم باہمی مفاد کے تمام شعبوں میں برطانیہ کے ساتھ تعاون کو مزید فروغ دینا چاہتے ہیں۔