اسلام آباد – وزیراعظم کی خصوصی ہدایت پر نیشنل ڈیزاسٹر مینجمنٹ اتھارٹی (این ڈی ایم اے) کی جانب سے پنجاب کے سیلاب متاثرہ علاقوں میں امدادی سرگرمیاں تیزی سے جاری ہیں۔
ترجمان این ڈی ایم اے کے مطابق متاثرہ اضلاع کے لیے مزید امدادی سامان روانہ کیا گیا ہے۔ خانیوال کے سیلاب متاثرین کے لیے پی ڈی ایم اے پنجاب کو ایک ہزار خیمے فراہم کیے گئے ہیں۔ سکھر سے 13 ٹرکوں کے ذریعے 670 خیمے جبکہ اسلام آباد میں موجود این ڈی ایم اے کے وئیر ہاؤس سے 5 ٹرکوں کے ذریعے 330 خیمے خانیوال روانہ کیے گئے۔
ترجمان کے مطابق اب تک پنجاب کو 2,270 ٹن امدادی سامان فراہم کیا جا چکا ہے، جس میں خیمے، کمبل، مچھر دانیاں، پانی کے فلٹریشن پلانٹس، رضائیاں، فولڈنگ بیڈز، پانی کے کین اور 17 کشتیاں شامل ہیں۔ مجموعی طور پر اب تک پنجاب کے سیلاب متاثرین کے لیے 36 ہزار خیمے فراہم کیے جا چکے ہیں۔
این ڈی ایم اے نے واضح کیا ہے کہ وہ تمام سول، عسکری اور فلاحی اداروں کے ساتھ مسلسل رابطے میں ہے اور امدادی کارروائیوں کی ہر سطح پر ہمہ وقت نگرانی کر رہا ہے تاکہ متاثرین تک بروقت مدد پہنچائی جا سکے۔
