ریلویز کی اراضی پر 40 ارب روپے سے زائد کے فراڈ کا انکشاف، نیب نے تحقیقات شروع کر دیں

اسلام آباد — قومی احتساب بیورو (نیب) نے پاکستان ریلویز کی اراضی پر 40 ارب روپے سے زائد کے مبینہ فراڈ کے انکشاف کے بعد باضابطہ تحقیقات شروع کر دی ہیں۔
ذرائع کے مطابق نیب کی تحقیقات میں رائل پام کنٹری کلب، شالیمار ٹرسٹ ہسپتال، فور برادرز کمپنی سمیت متعدد ہائی پروفائل کیسز شامل ہیں۔ ان کیسز میں قیمتی سرکاری اراضی کے غیر قانونی استعمال، لیز میں بے ضابطگیاں اور قومی خزانے کو بھاری نقصان پہنچانے کے الزامات کی جانچ کی جا رہی ہے۔
ابتدائی معلومات کے مطابق مختلف ادوار میں ریلویز کی زمین کو قواعد و ضوابط کے برخلاف نجی اداروں کے حوالے کیا گیا، جس کے باعث ریاست کو اربوں روپے کا نقصان ہوا۔ نیب حکام کا کہنا ہے کہ تحقیقات کے دوران تمام متعلقہ ریکارڈ طلب کر لیا گیا ہے اور ذمہ دار افراد کے تعین کے بعد قانون کے مطابق کارروائی کی جائے گی۔
نیب کا مؤقف ہے کہ قومی اثاثوں کے تحفظ اور بدعنوانی کے خاتمے کے لیے تحقیقات کو شفاف اور بلاامتیاز رکھا جائے گا، جبکہ پیش رفت کی بنیاد پر مزید ریفرنسز دائر کیے جانے کا امکان بھی ظاہر کیا جا رہا ہے۔
یہ انکشاف ایسے وقت میں سامنے آیا ہے جب سرکاری اداروں میں مالی نظم و ضبط اور احتساب کے مطالبات میں اضافہ ہو رہا ہے۔