اسلام آباد: وزیرِ اعظم محمد شہباز شریف ورلڈ اکنامک فورم (WEF) کی سالانہ کانفرنس 2026 میں شرکت کے لیے سوئٹزرلینڈ کے شہر ڈایووس روانہ ہو گئے ہیں۔ یہ کانفرنس 19 سے 23 جنوری 2026 تک منعقد ہو رہی ہے۔
وزیرِ اعظم کے ہمراہ ایک اعلیٰ سطحی وفد بھی موجود ہے، جس میں نائب وزیرِ اعظم و وزیرِ خارجہ محمد اسحاق ڈار، وزیرِ اقتصادی امور احد چیمہ، وزیرِ اطلاعات و نشریات عطا اللہ تارڑ، معاونِ خصوصی طارق فاطمی اور دیگر سینئر حکام شامل ہیں۔
دورے کے دوران وزیرِ اعظم کی اہم سفارتی اور اقتصادی مصروفیات طے ہیں۔ وہ مختلف ممالک کے سربراہانِ مملکت و حکومت، عالمی مالیاتی اداروں اور بین الاقوامی تنظیموں کے رہنماؤں سے دو طرفہ ملاقاتیں کریں گے۔
دورے کا ایک نمایاں پہلو بزنس راؤنڈ ٹیبل اجلاس ہے، جس کا مشترکہ اہتمام پاکستان اور ورلڈ اکنامک فورم کر رہے ہیں۔ اجلاس میں عالمی سطح کی بڑی کمپنیوں کے سربراہان شرکت کریں گے، جو پاکستان میں سرمایہ کاری کے مواقع تلاش کرنے یا اپنی موجودہ سرمایہ کاری میں توسیع کے خواہاں ہیں۔
حکومتی ذرائع کے مطابق وزیرِ اعظم کا یہ دورہ پاکستان کے معاشی امکانات اجاگر کرنے، غیر ملکی سرمایہ کاری کے فروغ اور عالمی سطح پر پاکستان کے مؤقف کو مؤثر انداز میں پیش کرنے کے لیے اہم قرار دیا جا رہا ہے۔
