نیویارک – اقوام متحدہ کی جنرل اسمبلی سے خطاب کرتے ہوئے فرانسیسی صدر نے واضح اعلان کیا ہے کہ عالمی برادری مزید انتظار نہیں کرسکتی اور اب وقت آ گیا ہے کہ غزہ کی جنگ کو مکمل طور پر ختم کیا جائے۔
صدر نے کہا کہ جاری خونریزی نے نہ صرف مشرقِ وسطیٰ بلکہ پوری دنیا کو شدید عدم استحکام سے دوچار کر رکھا ہے۔ ان کے مطابق جنگ کا طول پکڑنا انسانی المیے کو مزید بڑھا رہا ہے اور امن کی ہر کوشش کو نقصان پہنچا رہا ہے۔
انہوں نے زور دیا کہ تمام فریقین فوری طور پر فائر بندی پر متفق ہوں اور انسانی بنیادوں پر امداد کی فراہمی کو یقینی بنائیں۔ فرانسیسی صدر کے مطابق دنیا کے بڑے ممالک پر یہ ذمہ داری عائد ہوتی ہے کہ وہ اپنے اثر و رسوخ کو استعمال کرتے ہوئے مسئلے کے مستقل حل کی طرف پیش رفت کریں۔
ان کا کہنا تھا کہ فلسطینی ریاست کے قیام کے بغیر خطے میں پائیدار امن قائم نہیں ہوسکتا، اور اسی لیے اب عملی اقدامات ناگزیر ہیں۔
