پاکستان اور سعودی عرب کا توانائی اور معدنیات کے شعبوں میں تعاون مزید مضبوط بنانے پر اتفاق

اسلام آباد: پاکستان اور سعودی عرب نے توانائی اور معدنیات کے شعبوں میں دوطرفہ تعاون کو مزید فروغ دینے پر اتفاق کرتے ہوئے اقتصادی اور اسٹریٹجک تعلقات کو مضبوط بنانے کے عزم کا اعادہ کیا ہے۔
یہ اتفاقِ رائے وفاقی وزیر برائے پٹرولیم علی پرویز ملک اور پاکستان میں مملکتِ سعودی عرب کے سفیر نواف بن سعید احمد المالکی کے درمیان اسلام آباد میں ہونے والی ملاقات کے دوران ہوا۔
ملاقات میں دونوں فریقین نے جاری تعاون کا جائزہ لیا اور توانائی و معدنیات کے شعبوں میں تعاون کے نئے مواقع پر تبادلہ خیال کیا۔ اس موقع پر اقتصادی شراکت داری کے فروغ اور باہمی مفاد پر مبنی سرمایہ کاری کے مواقع بڑھانے کی ضرورت پر زور دیا گیا۔
سعودی سفیر نواف بن سعید احمد المالکی نے ریاض میں حال ہی میں منعقد ہونے والے فیوچر منرلز فورم میں پاکستان کی فعال شرکت کو سراہا اور معدنیات کے شعبے میں تعاون کے فروغ کے لیے مسلسل روابط کی اہمیت پر زور دیا۔
وفاقی وزیر علی پرویز ملک نے فیوچر منرلز فورم کے کامیاب انعقاد پر سعودی عرب کو مبارکباد دیتے ہوئے کہا کہ یہ فورم علاقائی تعاون کے لیے ایک اہم پلیٹ فارم فراہم کرتا ہے۔ انہوں نے کہا کہ پاکستان اور سعودی عرب توانائی اور معدنیات کے شعبوں میں تعاون بڑھانے کی وسیع صلاحیت رکھتے ہیں۔
وفاقی وزیر نے اس اعتماد کا اظہار کیا کہ پاکستان اور سعودی عرب کے درمیان دیرینہ برادرانہ تعلقات عملی نتائج میں تبدیل ہوں گے، جن میں سرمایہ کاری، ٹیکنالوجی کے تبادلے اور پائیدار ترقی کے مشترکہ منصوبے شامل ہوں گے۔
ملاقات کے اختتام پر دونوں فریقین نے آئندہ عرصے میں اقتصادی اور اسٹریٹجک تعاون کو مزید مضبوط بنانے کے لیے قریبی رابطہ برقرار رکھنے پر اتفاق کیا۔